.
O pasado 26 de Xuño ten lugar no antigo cuartel Sánchez Aguilera de Ferrol un simulacro de gran catástrofe, actividade encadrada no programa de formación do grupo de rescate de Briegal. No evento, que pretendía simular a explosión dun camión cisterna cargado con substancias perigosas estacionado nunha área residencial, participaron grupos de Bombeiros Ferrol, Bombeiros Navantia, Bombeiros Narón, ONG Acción Norte, Unidade Canina de Rescate do Principado de Asturias, Asociación de Cans de Salvamento de Galicia e Briegal, ademais de contar coa colaboración do Concello de Ferrol, Cruz Vermella e diversas empresas relacionadas co sector das emerxencias.
O exercicio consistiu nun traballo de procura e rescate durante 12 horas de maneira ininterrompida na que os grupos se poñen ao servizo do Posto de Mando, o cal coordina a actuación dos mesmos en diversos sitios de traballo.
Desenvolvéronse os seguintes traballos:
- Procura en entullos
- Procura e rescate en espazos confinados
- Apontoamentos
- Rescate vertical mediante uso de cordas
- Rescate en vehículos
- Rescate mediante corte e penetración en elementos horizontais e verticais.
O simulacro sáldase cun resultado positivo, por unha banda o noso equipo continúa fortalecendo as súas capacidades de rescate e por outro compartimos dinámicas de traballo con outros grupos, sempre positivo para coñecer outras dinámicas e para mellorar a coordinación no caso de que sexa necesario.
